Gerb

06 may 2014, 12:30
W1siziisijiwmtuvmdyvmtuvnwzlehr5n2c2nl8zmdu3ms5qcgcixsxbinailcj0ahvtyiisijy1nhgzmjcjil1d?sha=a2bc54c570cc3b68

İlham Əliyev, Gürcüstan Prezidenti Giorgi Marqvelaşvili və Türkiyə Prezidenti Abdullah Gül əvvəlcə rəsmi foto çəkdirdilər.

Sammiti Gürcüstan Prezidenti Giorgi MARQVELAŞVİLİ açaraq dedi:

- Mən istəyirəm həmkarlarımı, yüksək səviyyəli qonaqları, Azərbaycan və Türkiyə prezidentlərini, gələn qonaqlarımızı, onların nümayəndə heyətlərini salamlayım.

Artıq bizim görüşlərimiz və əməkdaşlığımız intensiv xarakter daşıyır. Mənim ilk səfərim Türkiyəyə olub. Vurğulamaq istəyirəm ki, səfər zamanı mənə çox isti və mehriban münasibət göstərildi.

Biz bir həftə öncə cənab İlham Əliyevlə Praqada görüşdük, ondan əvvəl isə Bakıda bizim çox yaxşı görüşümüz oldu. Artıq çox illərdir ki, əməkdaşlıq edirik. Əməkdaşlığımız çox müsbətdir, ölkələrimiz və region üçün əlverişli və səmərəlidir.

Biz bugünkü görüşümüzlə birgə başladığımız işlərin əhəmiyyətini daha da artırırıq. Bu təşəbbüsə görə Abdullah Gülə xüsusi təşəkkürümü çatdırıram. Sammitə verdiyi məna və əhəmiyyətə görə İlham Əliyevə də xüsusi təşəkkürümü bildirirəm.

Azərbaycan Prezidenti İlham ƏLİYEV çıxış edərək dedi:

- Hörmətli Gürcüstan Prezidenti, hörmətli Türkiyə Prezidenti!

İlk növbədə, cənab Prezident, bu təşəbbüs üçün Sizə minnətdaram. Qardaş Gürcüstan torpağında yenidən olmağımdan çox məmnunam. Əminəm ki, bu təşəbbüsün çox gözəl nəticələri olacaqdır. İlk dəfədir ki, üç ölkənin prezidentləri rəsmi qaydada Sammitdə toplaşmışlar. Əminəm ki, Sammitin çox gözəl nəticələri olacaqdır.

Ölkələrimiz arasındakı əlaqələr böyük tarixə malikdir. Həm ikitərəfli əlaqələr çox yüksək səviyyədədir, həm də biz üçtərəfli formatda birgə səylər göstəririk, birgə təşəbbüslər irəli sürürük. Bu gün Gürcüstan-Türkiyə-Azərbaycan üçtərəfli əməkdaşlığı nəinki ölkələrimiz, eyni zamanda, bölgə və dünya üçün böyük əhəmiyyət kəsb edir. Çünki bizim əməkdaşlığımızın təməlində ortaq maraqlar dayanır. Eyni zamanda, bizim birgə həyata keçirdiyimiz layihələr regional çərçivələrdən çıxıb qlobal məna daşımaqdadır.

Ona görə, Sammitin keçirilməsi özlüyündə çox əlamətdar bir hadisədir, beynəlxalq hadisədir. Əlbəttə ki, bu gün müzakirə olunacaq məsələlər mahiyyət etibarı ilə də çox böyük məna daşıyır. Əminəm ki, biz bu gün həm beynəlxalq məsələlər, həm regional təhlükəsizlik və enerji təhlükəsizliyi məsələləri, eyni zamanda, nəqliyyat, humanitar sahələrdə əməkdaşlıq ilə əlaqədar fikir mübadiləsi aparacağıq və növbəti dövr üçün birgə fəaliyyət planı haqqında da danışacağıq. Bir daha Sizə bu təşəbbüsə və göstərdiyiniz qonaqpərvərliyə görə minnətdaram.

Sonra Türkiyə Prezidenti Abdullah GÜL çıxış edərək dedi:

- Hörmətli Gürcüstan Prezidenti Giorgi Marqvelaşvili.

Hörmətli Azərbaycan Prezidenti, dəyərli qardaşım İlham Əliyev.

Dəyərli media nümayəndələri.

Gürcüstanda üçtərəfli Sammitdə - Tbilisidə görüşməkdən məmnunluq hissi keçirirəm. Əsasən bu üç ölkə arasında genişmiqyaslı sıx əməkdaşlıq əlaqələri mövcuddur. O vaxt - 2007-ci ildə prezidentlər səviyyəsində də Bakı-Tbilisi-Qars dəmir yolunun Gürcüstan hissəsinin təməlqoyma mərasimində görüşmüşdük. İndi də yenə hamımız burada birlikdəyik.

Əvvəlcə xarici işlər və digər nazirlərimiz müxtəlif səviyyələrdə görüşürdülər. Bir az sonra geniş şəkildə müzakirələr aparacağıq. Bakı-Tbilisi-Ceyhan, Bakı-Tbilisi-Ərzurum, Bakı-Tbilisi-Qars, Transanadolu kimi regional və qlobal miqyasda mühüm layihələri bu üç ölkə həyata keçirmişdir. Bu üç ölkənin Cənubi Qafqazda sabitlik və rifaha töhfəsi artıq hamı tərəfindən təqdir edilməyə başlandı. Biz Qafqazın hündür dağlarını bir divar olmaqdan çıxardıq, bir qapı, bir əməkdaşlıq sahəsi vəziyyətinə gətirdik. Təbii ki, bundan böyük məmnunluq duyuruq. Həm siyasi sahədə xalqlarımız bir-birinin qardaşıdır, qonşularıdır, həm də aralarında yaxın dostluğa söykənən əməkdaşlıq əlaqələri iqtisadi sahədə də özünü büruzə verməkdədir.

Bunları prezidentlər olaraq ən yüksək səviyyədə yenidən nəzərdən keçirəcəyimizə və bu cür sammitlərin bundan sonra da davamlı olaraq baş tutacağına ümid edirəm. Bundan böyük məmnunluq hissi duyuram. Ev sahibliyinə görə bir daha Sizə təşəkkür edirəm.

X X X

Sammitdə dövlət başçıları son illərdə ölkələrimiz arasında iqtisadiyyat, ticarət, nəqliyyat, energetika, həmçinin turizm sahələrində əməkdaşlığın yekunlarını nəzərdən keçirdilər.

Tədbirdə Bakı-Tibilisi-Ceyhan neft, Bakı-Tbilisi-Ərzurum qaz kəmərlərinin əhəmiyyəti qeyd edildi, Bakı-Tbilisi-Qars dəmir yolu layihəsinin uğurla həyata keçirilməsindən məmnunluq ifadə olundu.

Azərbaycan, Gürcüstan və Türkiyə arasında müxtəlif sahələrdə əməkdaşlığın daha da inkişaf etdirilməsi perspektivləri müzakirə edildi. Prezidentlər bu formatda qarşılıqlı faydalı əməkdaşlığın daha da möhkəmləndirilməsi əzmində olduqlarını bildirərək belə görüşlərin müntəzəm keçirilməsinin vacibliyini vurğuladılar.


Böyük ölçüdə



Böyük ölçüdə