Möhtərəm İlham Əliyev cənabları,

Bu, mənim Sizə minnətdarlıq məktubumdur. Xarici ölkələrə səfər edərkən orada Azərbaycanı və bütün azərbaycanlıları tanıtdırmağınız xalqımız kimi məni də çox sevindirir və bunu alqışlayıram.

Bu yaxınlarda Siz Serbiyaya işgüzar səfərə getmişdiniz və orada İkinci Dünya müharibəsi zamanı faşist işğalçılarına qarşı vuruşmuş əfsanəvi partizan, həmyerlimiz Mehdi Hüseynzadənin qəbrini ziyarət etdiniz. Vətəndən uzaqlarda elə Vətənimiz uğrunda mübarizə apararaq qəhrəmancasına həlak olmuş Mehdi Hüseynzadənin məzarını ziyarət etməyinizi televizordan izlədik. Bu hadisə Azərbaycan xalqı kimi mənə də o qədər təsir etdi ki, sevincimdən gözlərim yaşardı. Siz uzaq ölkədə bu qəhrəmanı yad etdiniz, onun ruhunu şad etdiniz. Hörmətli Prezident, buna görə bütün Azərbaycan xalqı Sizə minnətdardır.

Bu gün xalqımızın Mehdi Hüseynzadə kimi, Mübariz İbrahimov kimi on minlərlə igid oğulları var. Mən ürəkdən inanıram ki, göydə Allahın köməyi, yerdə Sizin rəhbərliyiniz və bacarığınız sayəsində xalqımız doğma Qarabağımıza qayıdacaqdır. O gün çox uzaqda deyil. Biz Sizinlə birlikdə buna nail olacağıq.

Milli Qurtuluş günü münasibətilə Sizi ürəkdən təbrik edir və Sizə cansağlığı arzulayıram.

Xanoğlan Kərimov
Ağcabədi rayonu, Hindarx qəsəbəsi, Azərbaycan.