Möhtərəm Prezident!

İctimai siyasi fəaliyyətimi yüksək qiymətləndirərək mənə Prezidentin fərdi təqaüdünü verdiyinizə görə, Sizə səmimi qəlbdən təşəkkürümü bildirirəm. Mən həm ictimai-siyasi, həm də elmi-pedaqoji fəaliyyətimdə Sizin qayğınızı həmişə hiss etmişəm. Qeyd etmək istəyirəm ki, mənim ictimai-siyasi fəaliyyətim ulu öndər Heydər Əliyevə “91-lərin” məşhur müraciəti ilə başlayır. Bu illər ərzində mən birmənalı olaraq, daim Heydər Əliyev siyasətinin, “Azərbaycanın dövlət müstəqilliyi əbədidir, dönməzdir və sarsılmazdır” - amalının yorulmaz daşıyıcısı olmuşam.

Cənab Prezident!

Ulu öndər Heydər Əliyevin banisi və qurucusu olduğu dövlətimizin sükanının etibarlı əllərdə olmasını bütün dünya etiraf edir. Sizin siyasətinizin strateji xətti olan -“qara qızılı insan kapitalına çevirmək” - ideyanız günbəgün həyatda öz təsdiqini tapır və bu səbədən də insan potensialının inkişafı Azərbaycanda hər il yüksəlir. Sizin bu Sərəncamınız məni həm də bir alim kimi ruhlandırır.

Müstəqil Azərbaycanımızın XXI əsrdə inamla irəlilədiyi bir zamanda yaşadığımız dövrün çətinliklərinə, problemlərinə baxmayaraq, Sizin rəhbərliyiniz sayəsində Azərbaycan iqtisadiyyatı uğurlu inkişaf yolu keçir. Bu illərdə Azərbaycanın ictimai-iqtisadi həyatının bütün sahələrində əsaslı dönüş yaranmış, böyük uğurlar və nailiyyətlər qazanılmışdır.

Əziz Prezidentim!

Fəaliyyətimə verdiyiniz bu ali qiymətə görə, Sizə öz adımdan, ailəm və övladlarım adından bir daha dərin minnətdarlıq bildirirəm!

Dərin hörmətlə,

Yeni Azərbaycan Partiyasının İdarə Heyətinin üzvü,
əməkdar elm xadimi professor Şahlar Əsgərov

Azərbaycan Respublikası, Bakı şəhəri.