İlham Əliyev Qaxda “İçəribazar” qala kompleksində tikinti və yenidənqurma işlərindən sonra yaradılan şəraitlə tanış olmuşdur

17 noyabr 2011, 13:00
İlham Əliyev Qaxda “İçəribazar” qala kompleksində tikinti və yenidənqurma işlərindən sonra yaradılan şəraitlə tanış olmuşdur

Prezident İlham Əliyev Qax şəhərindəki “İçəribazar” qala kompleksində tikinti və yenidənqurma işlərindən sonra yaradılan şəraitlə tanış olmuşdur.

Bildirildi ki, Qaxda XVI əsrdən mövcud olan “İçəribazar” qala qapıları və divarları maddi-mədəniyyət abidəsinin yenidən qurulması tarixi irsimizin qorunması istiqamətində hazırda ölkəmizin bütün bölgələrində həyata keçirilən tədbirlərin bariz nümunəsidir. Aparılan tikinti və yenidənqurma işlərindən sonra “İçəribazar” qala kompleksi müasir və füsunkar görkəm almışdır. Burada əsrlərdən bəri qorunub saxlanılan bir çox maddi-mədəniyyət abidələri müasir Qax şəhərinin bir hissəsi olmaqla yanaşı, onun tarixinə verilən dəyəri də nümayiş etdirir. Buradakı qədim eksponatlar - araba, xanımların istifadə etdikləri müxtəlif əşyalar, xalçalar və digər məhsullar göz oxşayır. Küçə boyunca qədimliyi özündə ehtiva edən qala divarları, drenaj sistemi, təbii daşlar buraya turistləri daha çox cəlb edir. Mükəmməl layihə əsasında açıq səma altında yaradılan 300 yerlik teatr, tətbiqi sənət ustaları üçün 10 emalatxana binası inşa olunmuş və İçəribazar küçəsi yenidən qurulmuşdur. Kompleksdəki 4,4 min kvadratmetr sahədə düzülən sərbənd daşlar bu ərazinin görkəminin rəngarəngliyinə əlavə çalarlar qatmışdır. Ərazidə 225 metr uzunluğunda su arxı da yenidən qurulmuşdur.

Dövlət başçısı kompleksin əvvəlki və yeni görüntülərini əks etdirən fotolara baxdı.

Kompleksin ərazisini gəzən Prezident İlham Əliyevə məlumat verildi ki, burada tikinti və yenidənqurma işlərinə 2010-cu ilin aprel ayında başlanılmış və qısa müddətdə yüksək keyfiyyətlə başa çatdırılmışdır. Dövlətimizin başçısının tapşırığına uyğun olaraq, kompleksin ətrafla ümumi ansambl təşkil etməsi və uzlaşdırılması diqqət mərkəzində saxlanılmışdır. İçəribazar küçəsindəki fərdi evlərin dam örtükləri yenilənmiş, darvaza, pəncərə, tavan, sütun, balkonlarda sürahilər və digər hissələr taxta materialdan yüksək zövqlə yenidən işlənmişdir.

Bildirildi ki, görkəmli bəstəkar, ictimai xadim Müslüm Maqomayevin atası usta Məhəmməd kişinin dəmirçi emalatxanası 1880-ci illərdə burada yerləşmişdir. 1902-ci ildə Qori seminariyasında təhsil alarkən Müslüm Maqomayev atasının vəsiyyətinə əsasən, dahi bəstəkar Üzeyir Hacıbəyli ilə burada olmuşlar. Milli memarlıq üslubunda çapma daş və qırmızı kərpiclə nəfis şəkildə işlənilən, dekorativ suvaq vurulan küçə divarları da insanda xoş ovqat yaradır. Qalanın giriş və çıxış qapıları da ölkəmizin memarlıq ənənələrinin təbliği baxımından mühüm əhəmiyyət kəsb edir. Kompleksdə yerli əhalinin, turistlərin istirahəti üçün hər cür şərait yaradılmışdır. Ərazisində yaşıllıq zolağının da salındığı kompleksin işıqlandırma sistemi dizaynı və mükəmməlliyi ilə diqqəti cəlb edir. Buradakı teatrın səhnəsində orijinal işıqlandırma sistemi quraşdırılmışdır.

Kompleksə xüsusi gözəllik verən Nəsimi parkı yenidən qurulmuşdur. İçəribazar küçəsinin içməli su və qaz xətləri də yenilənmişdir. Bir sözlə, əsaslı tikinti və yenidənqurmadan sonra “İçəribazar” qala kompleksi görkəmini tamamilə dəyişmiş və ölkəmizin ən gözəl istirahət məkanlarından birinə çevrilmişdir.

Azərbaycan Prezidenti Qaxın baş planını, şəhərin qədim hissəsinin bərpasını, perspektiv planını və yeni küçələrin abadlaşdırılmasını əks etdirən stendlərə baxdı.

“İçəribazar” qala kompleksində fəaliyyət göstərən tətbiqi sənət, ağacoyma, toxuculuq, Şərq şirniyyatı və təndirxana otaqları ilə tanış olan dövlətimizin başçısı Qax rayon ictimaiyyətinin nümayəndələri ilə görüşdü.

Prezident İlham ƏLİYEV Qax rayon ictimaiyyətinin nümayəndələrini salamlayaraq dedi:

-Sizi ürəkdən salamlayıram. Qaxda yenidən olmağımdan çox şadam, çox məmnunam. Bildiyiniz kimi, bu, Qaxa mənim birinci səfərim deyil. Hər dəfə Qaxda olanda, yenilikləri görəndə çox sevinirəm. Rayon inkişaf edir, gözəlləşir, belə gözəl memarlıq əsərləri yaradılır. Deyə bilərəm ki, müasir Azərbaycanda belə gözəl guşələrin yaradılması yəqin ki, Qaxdan başlayıb.

Bizim tarixi bölgələrimiz çoxdur, bu cür gözəl tarixi binalarımız da, abidələrimiz də vardır. Ancaq tarixi binaları bu səviyyədə bərpa etmək üçün əlbəttə ki, böyük səylər göstərilmişdir. Bu kiçik qəsəbə böyük məhəbbətlə, zövqlə və tarixi həqiqəti saxlamaq şərti ilə yaradılmışdır. Əslində burada gördüklərimiz qədim tarixdən bizə miras qalan əsərlərdir. Ancaq bax bu gözəl binaları bu səviyyədə bərpa etmək, burada sözün əsl mənasında turizm mərkəzini yaratmaq böyük peşəkarlıq və məharət tələb edirdi. Mən çox şadam ki, Qaxın tarixi simasını əks etdirən bu kiçik guşə artıq fəaliyyətə başlayır. Burada sənətkarlar öz sənətlərini təqdim edirlər, açıq səma altında gözəl səhnə yaradılıbdır. Bir sözlə, belə guşələr Azərbaycanda daha da çox olmalıdır.

Çünki bir daha demək istəyirəm ki, bizim çox zəngin tariximiz, abidələrimiz vardır. Onların hamısı bərpa olunmalıdır. Həm Bakıda, həm bütün bölgələrdə. Tarixi abidələr baxımından Azərbaycan çox zəngin dövlətdir. Biz bu abidələri qorumalıyıq, bərpa etməliyik və xüsusilə ölkəmizin tarixi yerlərində qədim üsluba üstünlük verməliyik. İndi Qaxda çoxsaylı yeni binalar tikilir və tikiləcəkdir. Bu binalar da Qaxa xas olan üslubda tikilməlidir. Mən bunu alqışlayıram.

Azərbaycanın bölgələri öz müxtəlifliyi ilə fərqlənir, seçilir. Hər bir bölgə, hər bir rayon üçün ayrıca bir şəhərsalma inkişaf planı hazırlanmalıdır. Bəzi yerlərdə artıq işlər başlamışdır, bəzi yerlərdə yaxın zamanlarda başlanacaqdır. Əlbəttə ki, bu gözəl yerlər turistləri cəlb edəcəkdir. Bu bölgənin inkişafı daha çox turizmlə bağlı olacaq və Azərbaycan bu məsələlərlə çox ciddi məşğuldur. Bu il Azərbaycanda “Turizm ili” elan edilmişdir. Paytaxtda, bölgələrdə gözəl mehmanxanalar açılıb. O cümlədən Qaxda yeni mehmanxananın açılışında da iştirak etmişəm. Deyə bilərəm ki, ən inkişaf etmiş ölkələrdə olan şəraitlə bu mehmanxanadakı şərait arasında heç bir fərq yoxdur. Bu, onu göstərir ki, investorlar Azərbaycanın gələcəyinə inanır. Baxmayaraq ki, Qax paytaxtdan uzaqda yerləşir, indi tikilən və gələcəkdə tikiləcək yollar, aeroportlar Qaxı paytaxt ilə birləşdirir. Bir də ki, burada yaradılan şərait, bütün bu gözəl təbiət bizi ruhlandırır.

Ancaq əgər şərait yaradılmasa heç kim gəlməz, nə ölkə daxilindən, nə də ki, xaricdən. Gözəl təbiət və təbii şərait böyük üstünlüyümüzdür, xüsusilə Qax kimi mənzərəli yerlərdə. Ancaq burada yaradılan infrastruktur, xidmət obyektləri də bu təbiətə uyğun olmalıdır və mən bunu görürəm. Bir daha demək istəyirəm ki, mən artıq bir neçə dəfə burada olmuşam və hər dəfə Qaxda olanda, yenilikləri görəndə çox sevinirəm.

Turizm obyektləri ilə bərabər, rayonun gündəlik problemləri də həllini tapır. Bildiyiniz kimi, indi bütün infrastruktur layihələrinin icrası üçün konkret işlər görülür. Biz Qaxın su təchizatı ilə bağlı böyük layihəni başlamışıq. İki il ərzində şəhərin və bəzi ətraf kəndlərin su problemi yüz faiz həll olunacaqdır, kanalizasiya da həmçinin. Bu, təkcə Qax üçün deyil, bütün bölgələr üçün ciddi problemdir. Hər bir bölgədə bu layihələr icra olunur və indiki vəziyyət, əlbəttə ki, bizi qane edə bilməz. Su fasilələrlə, qrafiklə verilir. İndi Bakının bəzi bölgələrində də su fasilələrlə verilir və bu vəziyyəti dəyişmək üçün biz ciddi tədbirlər görürük. Hər bir bölgədə, hər bir rayonda bu işlər, o cümlədən qazlaşdırma aparılır, yollar, həmçinin kənd yolları çəkilir və rayonun inkişafı ilə bağlı bütün məsələlər öz həllini tapacaqdır. Dövlət öz üzərinə düşən vəzifəni icra edir. Dövlət vəsaiti ayrılır. Özəl sektor da bu işlərə qoşulur, investorlar, iş adamları daha da geniş şəkildə qoşulmalıdırlar ki, ölkəmizin iqtisadiyyatı hərtərəfli inkişaf etsin.

Qaxın inkişafı üçün regionların sosial-iqtisadi inkişafı Dövlət Proqramında konkret tapşırıqlar verilmişdir. Onlar icra edilir. Proqram 2013-cü ildə başa çatacaqdır. Əminəm ki, o vaxta qədər rayonun əsas infrastruktur, sosial və iqtisadi problemləri öz həllini tapacaq. Bütün infrastruktur yenidən qurulacaq və ondan sonrakı dövr üçün biz yeni proqram hazırlayacağıq. Bu proqram artıq sürətli inkişaf proqramı olacaqdır. Çünki 2003-2013-cü illərdə diqqətimizi daha çox infrastruktur layihələri cəlb etmişdir. Yollar, elektrik enerjisi təchizatı, qazlaşdırma, su-kanalizasiya layihələri, məktəblərin tikintisi, xəstəxanalar, idman qurğuları. Növbəti iki il ərzində ölkə miqyasında bu məsələlər öz həllini tam şəkildə tapmalıdır. Ondan sonrakı dövrdə də əlbəttə ki, həyat yeni tələbləri qoyacaq qarşımızda. Həyat yerində durmur. Azərbaycan inkişaf edir və çox uğurla inkişaf edir.

Mən bir daha sizi ürəkdən salamlayıram, sizi alqışlayıram. Burada gördüyüm mənzərə əlbəttə ki, rayon rəhbərliyi tərəfindən icra edilir. Bu təşəbbüsü rəhbərlik irəli sürmüşdür, ancaq bilirəm ki, qaxlılar bu işlərdə böyük fəallıqla iştirak etmişlər. Mən əlbəttə əminəm ki, biz hamımız indi sevinirik, fəxr edirik ki, belə gözəl tarixi diyarda belə gözəl əsərlər yaradılıb.

Sizə yeni uğurlar arzulayıram.

X X X

Rayon sakini, 2 nömrəli orta məktəb-liseyin müəllimi Nazlı İSMAYILOVA Qaxa göstərilən diqqət və qayğıya görə qaxlılar adından dövlətimizin başçısına minnətdarlıq edərək dedi:

-Möhtərəm cənab Prezident, Sizi, ümummilli liderimiz Heydər Əliyevin siyasi xəttinin layiqli davamçısını, müstəqil Azərbaycan Respublikasının Prezidentini Vətənimizin ən gözəl, ən dilbər guşələrindən biri olan Qax rayonunda salamlayır, Sizə rayon sakinləri adından “Xoş gəlmisiniz!” deyirəm.

Cənab Prezident, bu gün çox tarixi bir gündür. Düz 21 il bundan əvvəl ulu öndərimiz sovetlər birliyi dönəmində böyük cəsarət nümayiş etdirərək üçrəngli bayrağımızın dövlət atributu kimi qəbul edilməsinə nail olmuşdur. Bu tarixi qərar müstəqilliyimizin təməl daşı olmuşdur. Əsası ümummilli lider Heydər Əliyev tərəfindən qoyulmuş bu müstəqillik Sizin tərəfinizdən daha da inkişaf etdirilmiş, möhkəmləndirilmiş, dönməz və əbədi olmuşdur. Bu gün həm biz, həm də rayonun bütün sakinləri, respublikanın əhalisi fəxr edir ki, üçrəngli bayrağımız dünyada ən uca zirvədə dalğalanmaqdadır.

Respublikamız bu gün sürətlə inkişaf edir, abadlaşır, müasirləşir, əhalinin sosial rifah halı yaxşılaşır. Buna əmin olmaq üçün regionların, o cümlədən Qaxımızın tərəqqisinə nəzər yetirmək kifayətdir. Qısa müddət ərzində Qaxda çoxlu təhsil, səhiyyə, idman, turizm kompleksləri tikilmiş, parklar, xiyabanlar salınmış, yollar çəkilmiş, istehsal müəssisələri yaradılmışdır. Qədim İlisu kəndinin sel sularından qorunması üçün çəkilmiş bənd, tikilmiş körpü rayonumuzun sakinlərinə böyük töhfədir.

Cənab Prezident, açılışını etdiyiniz mehmanxana kompleksi, avtovağzal şəhərimizə yaraşıq verməklə yanaşı, həm rayon sakinlərinə, həm gələn qonaqlara yaxşı xidmət edəcək, turizmin inkişafına yeni imkanlar açacaqdır. Biz bu gün bir daha şahidi olduq ki, Siz tarixi yaddaşımızın, eyni zamanda, mədəni irsimizin qorunması, gələcək nəsillərə ötürülməsinə nə qədər böyük diqqət və qayğı göstərirsiniz. Bütün bunlara görə həm Sizə, həm də Sizin yaxın silahdaşınız olan, xalqımızın sevimli qızı Mehriban xanım Əliyevaya rayonumuzun sakinləri adından təşəkkür edirəm.

Cənab Prezident, müstəqilliyimizin 20 illiyi ilə əlaqədar tədbirdə qeyd etdiniz ki, əgər torpaqlarımız işğal olunmasaydı, bizə qarşı etnik təmizləmə siyasəti aparılmasaydı daha böyük uğurlar əldə edə bilərdik. Bəli, cənab Prezident, hər bir azərbaycanlı, o cümlədən biz qaxlılar da görürük, bilirik ki, bu problemin həlli üçün Siz nə qədər gərgin fəaliyyət göstərirsiniz. Biz bütün bunları yüksək qiymətləndiririk, “daim Sizinləyik” deyirik. Sizin hər bir çağırışınıza hazırıq!

Oktyabrın 24-də Azərbaycanın Birləşmiş Millətlər Təşkilatının Təhlükəsizlik Şurasına qeyri-daimi üzv seçilməsi də hər bir azərbaycanlı kimi, bütün qaxlıları da ürəkdən sevindirdi. Bunu Sizin fəaliyyətinizin yeni bir uğuru kimi dəyərləndiririk. Bütün bunlara görə Sizə həm respublikamızın, həm də Qaxın əhalisi adından ürəkdən təşəkkür edirik. Azərbaycanın bütövlüyü, inkişafı, müstəqilliyi uğrunda apardığınız hər bir işə görə Sizə minnətdarıq. Sizə uğurlar diləyirik, Allah yardımçınız olsun!

X X X

Prezident İlham ƏLİYEV: Çox sağ olun. Bu gün çox tarixi bir gündür. Hələ Sovet İttifaqı dönəmində ulu öndər Azərbaycanın milli bayrağını Naxçıvan Muxtar Respublikasının dövlət bayrağı kimi elan etmişdir. O bayrağı dövlət rəmzi kimi o vaxt Naxçıvanın Ali Məclisi qəbul etmişdir və eyni zamanda, Azərbaycan Ali Sovetinin qarşısında vəsatət qaldırılmışdır ki, bu bayraq Azərbaycan dövlətinin rəsmi bayrağı kimi elan edilsin. Ancaq, əfsuslar olsun ki, bu təşəbbüsə dərhal reaksiya verilməmişdir. Halbuki verilməli idi. 


Bu addım və ondan sonrakı addımlar müstəqilliyimizi yaxınlaşdırdı. Müstəqilliyimiz labüd idi, yəni, bu qaçılmaz idi. Aydın idi ki, Sovet İttifaqı dağılmaq ərəfəsində idi. Ancaq bu müstəqilliyi yaxınlaşdırmaq və tezliklə əldə etmək üçün hər halda Azərbaycanda ilk addımlar məhz ulu öndər tərəfindən Naxçıvanda atılmışdır. Həm milli bayrağın dalğalanması, Yeni Azərbaycan Partiyasının yaradılması, Sovet İttifaqının saxlanılması haqqında referendumun Naxçıvanda keçirilməməsi – bütün bu addımlar çox böyük siyasi iradə və cəsarət tələb edirdi. Çünki o zaman hələ Sovet İttifaqının nə vaxt dağılması haqqında qəti fikir yox idi və bugünkü Azərbaycan bax o çətin anlarda atılmış addımların nəticəsində həm formalaşmış, həm özünü qoruya bilmişdir. Xüsusilə 1993-cü ildə ölkəmiz üçün ən ağır vəziyyətdə yenə Heydər Əliyev artıq respublika miqyasında bütün məsuliyyəti öz üzərinə götürərək Azərbaycanı böyük bəlalardan xilas edə bilmişdir. Bu il biz müstəqilliyimizin 20 illiyini böyük sevinclə, böyük qürur hissi ilə, gözəl nəticələrlə qeyd edirik. Ölkə daxilindəki nəticələr göz qabağındadır. Hara getsən, hansı bölgəyə səfər etsən görərsən ki, hər yerdə inkişaf, hər yerdə tərəqqi, hər yerdə nikbinlik ovqatı vardır. Bundan sonra daha da yaxşı olacaqdır. Beynəlxalq səviyyədə, qeyd etdiyiniz kimi, uğurlarımızın bariz nümunəsi dünya birliyinin bizimlə olması nəticəsində özünü göstərmişdir. Bu, böyük tarixi qələbədir, gördüyümüz işlərin nəticəsidir. Bu hadisə Azərbaycanın dünyadakı imicinin nə qədər yüksək səviyyədə olmasını göstərir.

Mən tam əminəm ki, ölkə qarşısında duran bütün vəzifələr icra ediləcəkdir. Daxili və xarici siyasətlə bağlı artıq bunu tam qətiyyətlə demək mümkündür. Daxili siyasət, iqtisadi inkişaf Azərbaycanda ən yüksək səviyyədədir. Bütün mötəbər beynəlxalq təşkilatlar da bunu qeyd edirlər. Azərbaycanda son illər ərzində yaşanan inkişaf tarixdə heç bir ölkədə olmamışdır, bəlkə də olmayacaqdır. Xarici siyasətlə bağlı dostlarımızın sayı artır, dünya birliyi Azərbaycanın yanındadır və bizə inanır. Bizim ən ağır problemimiz torpaqlarımızın hələ də işğal altında qalmasıdır. Biz çalışırıq ki, bu problemi danışıqlar yolu ilə həll edək. Ancaq hələ ki, bu, mümkün deyildir. Danışıqları aparmaqla yanaşı, biz əlbəttə ki, ölkəmizi gücləndiririk. Ölkənin gücü təkcə maliyyə və iqtisadi meyarlarla ölçülmür. Hər bir bölgənin gücü, hər bir rayonun potensialının artırılması bizi gücləndirir. Gücümüz ondadır ki, bizdə iqtidarla xalq arasında birlik, inam, həmrəylik və əlbəttə ki, güclü ordumuz var. Biz ordumuzu böyük dərəcədə gücləndirə bilmişik və bu gün bizim ordu istənilən anda torpaqları hərbi yolla azad edə bilər. Biz bunu bilirik, düşmənlərimiz də və bu məsələ ilə məşğul olan vasitəçilər də bunu bilirlər. Çünki müasir dünyada nəyi isə gizlətmək mümkün deyildir. Biz heç qarşıya belə məqsəd də qoymamışıq ki, nəyi isə gizlədək.

Əksinə, biz Azərbaycanda keçirilən hərbi paradda ordu quruculuğunda əldə edilmiş nailiyyətləri xalqa nümayiş etdirdik.

Bu, həm nümayiş, eyni zamanda, xalq qarşısında hərbi sahədə görülmüş işlərlə bağlı hesabat idi. İndi Ermənistanla Azərbaycan arasında fərq elədir ki, bu, böyük bir uçurumdur və getdikcə daha da genişlənəcəkdir. Vasitəçilər də bunu bilirlər. Son zamanlar vasitəçilər fəallaşmışlar və əlbəttə ki, biz bunu alqışlayırıq. Beynəlxalq təşkilatların rəhbərləri ilə apardığım danışıqlar bunu bir daha göstərir ki, beynəlxalq vasitəçilər çox çalışırlar ki, məsələ tezliklə öz həllini tapsın, müharibə, münaqişə olmasın. Çünki hamı yaxşı başa düşür ki, bu dırnaqarası dondurulmuş vəziyyət çox çəkə bilməz. Həm Azərbaycanın iqtisadi gücü, həm Azərbaycan xalqının səbrinin tükənməsi, həm bizim hərbi potensialımız, demoqrafik üstünlüyümüz, hara baxsan, hansı sahəyə baxsan, hər yerdə Azərbaycan bir neçə pillə üstündür. Gələcəkdə bu fərq yalnız artacaqdır, azalmayacaqdır. Çünki biz bilirik ki, gələcəyimiz necə olacaqdır. İqtisadiyyatımız güclüdür, bizim təbii resurslarımız, insan potensialımız var, Azərbaycan xalqı gənc xalqdır. Bu da çox vacibdir. İndi bəzi ölkələrdə, xüsusilə Avropa ölkələrində xalqların yaşlanması ilə bağlı çox böyük müzakirələr aparılır, narahatlıq ifadə edilir. Azərbaycanın çox böyük insan resursları vardır. Ölkəmizdə təhsilə, elmə göstərilən diqqət Azərbaycan gənclərinin peşəkarlığını artırır. Gənclərimiz peşəkar, bilikli, vətənpərvər olmalıdırlar. Peşəkar, bilikli olmaq üçün dövlət şərait yaratmalıdır, vətənpərvər olmaq üçün əlbəttə ki, dövlət təbliğatı aparılmalıdır. Ancaq ölkədə elə vəziyyət yaradılmalıdır ki, hər bir vətəndaş qürur hissi ilə deyə bilsin ki, o, bu ölkənin vətəndaşıdır. Bu gün biz bunu görürük. Vətəndaşlarımız, gənclərimiz fəxr edirlər ki, Azərbaycan vətəndaşıdırlar.

Hər bir xarici qonaq Bakıya və bölgələrə gələndə əgər qərəzsizdirsə görür və etiraf edir ki, Azərbaycan dünya miqyasında ən yüksək səviyyədədir, Bakı şəhəri dünya miqyasında ən gözəl şəhərlərdən biridir, vaxt gələcək ən gözəl şəhər olacaqdır. Yəqin siz bilirsiniz ki, Bakı ilə bağlı böyük planlarımız vardır. Planlarımız təkcə Bakı ilə bağlı deyildir. Çünki bizim işimiz nəyi isə kiməsə göstərməkdən ibarət deyildir. Yəni, bir vitrin yaratmaq deyildir. Biz ən ucqar bölgələrdə, ən ucqar kəndlərdə müasir infrastruktur yaradırıq, yollar çəkirik, abadlıq işlərini aparırıq ki, hər bir yerdə yaşayan vətəndaş özünü yaxşı, rahat hiss etsin və fəxr etsin ki, Azərbaycan vətəndaşıdır.

Mən əminəm ki, qaxlılar və bütün başqa bölgələrdə yaşayan insanlar fəxr edirlər ki, Azərbaycan vətəndaşlarıdırlar. Biz, hər birimiz ölkəmizi öz işimizlə, öz addımlarımızla, ümumi işə verdiyimiz töhfələrlə gücləndirməliyik.

Sizi bir daha salamlayıram, sizə cansağlığı, xoşbəxtlik arzulayıram. Hələ görüşlərimiz çox olacaqdır. Çünki Qaxda gələcəkdə açılışlar çox olacaqdır. Yeni binaların, yeni obyektlərin tikintisi nəzərdə tutulur. Ona görə də açılışlar çox olacaq və biz sizinlə görüşəcəyik. Sağ olun.

X X X

Sonra xatirə şəkli çəkdirildi.

X X X

Daha sonra dövlətimizin başçısı qaxlı musiqiçilərin ifasını dinlədi.

X X X

Komplekslə tanış olan Prezident İlham Əliyev burada həyata keçirilən işləri yüksək qiymətləndirmişdir. 


Dövlətimizin başçısı Qax rayonunun tanınmış həkimlərindən olan Cəlal Məmmədovun çalışdığı əczaxanaya da baxdı. Qeyd edildi ki, Cəlal Məmmədov 1918-1920-ci illərdə Milli Ordunun əlahiddə korpusunun həkimi kimi fəaliyyət göstərmişdir.

Prezident İlham Əliyev tarixi irsimizin və maddi mədəniyyət abidələrimizin qorunması üçün bundan sonra da dövlətin dəstəyini əsirgəməyəcəyini vurğuladı. 

gallery-photogallery-photogallery-photogallery-photogallery-photo
SƏNƏDLƏR Fərmanlar 28 mart 2024
14:39
“Avtomobil yolları haqqında” Azərbaycan Respublikasının Qanununda dəyişiklik edilməsi barədə” Azərbaycan Respublikasının 2024-cü il 23 fevral tarixli 1101-VIQD nömrəli Qanununun tətbiqi və “Avtomobil yolları haqqında” Azərbaycan Respublikası Qanununun tətbiq edilməsi barədə” Azərbaycan Respublikası Prezidentinin 2000-ci il 10 mart tarixli 299 nömrəli Fərmanında dəyişiklik edilməsi haqqında Azərbaycan Respublikası Prezidentinin Fərmanı

Azərbaycan Respublikası Konstitusiyasının 109-cu maddəsinin 19-cu və 32-ci bəndlərini rəhbər tutaraq, “Avtomobil yolları haqqında” Azərbaycan Respublikasının Qanununda dəyişiklik edilməsi barədə” Azərbaycan Respublikasının 2024-cü il 23...

28 mart 2024, 14:39
SƏNƏDLƏR Fərmanlar 27 mart 2024
14:10
Azərbaycan Respublikası Prezidentinin 2017-ci il 25 dekabr tarixli 1760 nömrəli Fərmanı ilə təsdiq edilmiş “Azərbaycan Respublikasının İpoteka və Kredit Zəmanət Fondunun Nizamnaməsi”ndə dəyişiklik edilməsi haqqında Azərbaycan Respublikası Prezidentinin Fərmanı

Azərbaycan Respublikası Konstitusiyasının 109-cu maddəsinin 32-ci bəndini rəhbər tutaraq, “Qiymətli kağızlar bazarı haqqında” Azərbaycan Respublikasının Qanununda dəyişiklik edilməsi barədə” Azərbaycan Respublikasının 2023-cü il 6 iyul...

27 mart 2024, 14:10