Adil Abbasovdan, Goranboy, Azərbaycan

Möhtərəm Prezident!

Siz planetimizin görkəmli siyasi xadimlərindən biri, xalqımızın yeganə xilaskarı cənab Heydər Əliyevin oğlu və layiqli davamçısısınız. Azərbaycanımız bu gün dünya miqyasında tanınır və öndə getməkdə davam edir.

Hörmətli Prezident!

Şaxtalı, qarlı günlərdə bu məktubu Sizə ünvanlamağımız heç də təsadüf deyil. Belə ki, hər gün mavi ekranı dinlədikcə, dünyada gedən prosesləri izlədikcə bu gün əmin-amanlıq içində yaşadığımıza görə şükürlər edirik. Sizin Goranboya gəlişiniz və şəhərin abadlığı üçün 2 milyon manat vəsait ayırmağınız biz goranboyluları həddindən artıq sevindirmişdir.
Uzun müddət Goranboyda olmayanlar rayonumuza gəldikdə aparılan abadlıq işlərini görüb öz heyranlıqlarını gizlədə bilmirlər. Xüsusən son illərdə küçələrdə və xiyabanlarda aparılan abadlıq işləri, necə deyərlər göz oxşayır, insana dinclik, rahatlıq gətirir.

Dahi Nizami Gəncəvinin adının əbədiləşdirilməsi və onun şərəfinə salınmış xiyaban, yeni inşa edilmiş orta məktəb, şahmat məktəbinin və Yeni Azərbaycan Partiyasının binası və müasir şəkildə bərpa olunmuş mədəniyyət evi Goranboy şəhərinə xüsusi yaraşıq verir.

Uzun illərdir ki, Goranboya içməli su maşınlarla daşınırdı. Şəhərdə kanalizasiya sistemi yox idi. Sizin göstərişinizlə artıq su və kanalizasiya sistemi yenidən qurulur, 45 km məsafədən şəhərə boru xətti ilə bulaq suyu gətiriləcəkdir. Bu əvəzsiz nemət üçün goranboylular Sizə sonsuz minnətdarlığını bildirir, çox sağ olun deyirlər.

Cənab Prezident!

Azərbaycan xalqı öz gələcəyini həqiqətə, gerçəkliyə arxalanan İlham Əliyev siyasətində görür.

Sizə bundan sonra da böyük müvəffəqiyyətlər, uzun ömür, cansağlığı və gələcək işlərinizdə böyük uğurlar arzulayırıq. Gün o gün olsun ki, müstəqil Azərbaycanımızın 3 rəngli bayrağı Qarabağda dalğalansın.

Amin!

Goranboy şəhər sakini, Əmək və Müharibə veteranı
Abbasov Adil Xəlil oğlu və bir qrup ağsaqqalar tərəfindən.