17 may 2012, 16:00

Bəkir Məmmədovdan, Bakı, Azərbaycan

Əziz və hörmətli Prezident!

Bu məktubu Sizə sonsuz sevinc və minnətdarlıq hissləri ilə yazıram. Ölkənin hər bir vətəndaşına qayğı göstərən Sizin kimi Prezidentimiz olduğuna görə Ulu Tanrıya şükür edir, Sizin varlığınızdan ürək dolusu qürur duyuram.

Alman faşizmi üzərində Qələbənin 67-ci ildönümü münasibətilə bu il mayın 9-da bizimlə - Böyük Vətən müharibəsi iştirakçıları ilə səmimi və mehriban görüşünüzü heç vaxt unutmayacağıq. Bu görüş zamanı Siz hər birimizin problemini özümüzdən öyrənib onların həlli üçün dərhal göstəriş verdiniz. Mənim növbədənkənar minik avtomobili ilə təmin olunmaq barədə müraciətimlə bağlı verdiyiniz tapşırığa da qısa müddət ərzində əməl olundu.

Bu gün, 17 may 2012-ci ildə əmək və əhalinin sosial müdafiəsi naziri Fizuli Ələkbərov tərəfindən xüsusi hörmət və ehtiramla mənə “Lifan” markalı minik avtomobili təqdim edildi.

Bu, onu göstərir ki, ulu öndər Heydər Əliyevin ahıl insanlara, eyni zamanda Böyük Vətən müharibəsi iştirakçılarına böyük diqqət və qayğısını yüksək səviyyədə davam etdirirsiniz.

Əziz Prezident!

Bizə göstərdiyiniz daimi qayğıya və yüksək xeyirxahlığa görə Sizə bir daha öz dərin minnətdarlığımı bildirirəm.
Vətənimizi xöşbəxt sabahlara aparan yolda Tanrı daim Sizə yar olsun!

Hörmətlə,

Böyük Vətən müharibəsi əlili Bəkir Xanlar oğlu Məmmədov.
Azərbaycan Respublikası, Bakı şəhəri,
Yasamal rayonu General Akim Abbasov küçəsi, ev 10, mənzil 21.