Möhtərəm və əziz Prezident!

Böyük rəhbərimiz, ulu öndər Heydər Əliyevin siyasətinə nə qədər sadiq olduğunuzu, onun yolunu necə ləyaqətlə davam etdirdiyinizi bu günlərdə bir daha yaxından gördük və hiss etdik. Atanız kimi Siz də öz müdrik siyasətinizlə Azərbaycanı daim irəliyə doğru aparmaqla bərabər, ahıl insanları, həmçinin müharibə veteranlarını həmişə diqqətdə saxlayır, onlara öz qayğınızı əsirgəmirsiniz.

2012-ci il mayın 9-da faşizm üzərində Qələbə Günü münasibətilə Böyük Vətən müharibəsi iştirakçıları ilə görüşərkən Siz veteranların hər biri ilə səmimi şəkildə hal-əhval tutmağa, onları narahat edən məsələlərlə maraqlanmağa vaxt tapdınız. Hər kəs öz qayğısından və problemindən söz aça, öz suallarına cavab ala bildi. Bu görüş zamanı mən də növbədənkənar minik avtomobili və Gəncə şəhərində mənzillə təmin olunmağım üçün Sizə müraciət etdim.

Yüksək humanizm nümunəsi göstərərək mənim və digər veteranların müraciəti ilə bağlı verdiyiniz tapşırıq əsasında 2012-ci il mayın 17-də Əmək və Əhalinin Sosial Müdafiəsi Nazirliyində bizi hörmət və ehtiramla qəbul etdilər və mənə “Lifan” markalı minik avtomobili təqdim etdilər.

Nazirlikdə yaxın vaxtlarda Gəncədə istifadəyə veriləcək 81 mənzilli binada mənə mənzil veriləcəyini də bildirdilər. Hətta mənə veriləcək mənzilin otaqlarının şəkillərini göstərdilər. Təsəvvür edin ki, mən və ailə üzvlərimiz nə qədər sevinirik.

Qeyd edim ki, bir müddət bundan öncə mənim oğlum vəfat etmiş və ailəmizdə kədər, hüzn ovqatı hökm sürürdü. Bu gün bizə göstərilən qayğı – maşınla təmin olunmağım, həm də yaxın vaxtlarda mənə mənzil veriləcəyi xəbəri ailəmizdəki kədər ovqatını bir qədər yüngülləşdirdi. Bir daha gördük ki, dövlətimiz, möhtərəm Prezidentimiz bizi heç vaxt darda qoymayıb və qoymayacaqdır.

Əziz Prezident, bütün gördüyünüz işlərə görə Sizə təşəkkürümü bildirirəm.

Çox sağ olun ki, əhaliyə, həmçinin yaşlı insanlara daim böyük diqqət və qayğı göstərirsiniz.

Hörmətlə,

Böyük Vətən müharibəsi əlili
Cəfərov Qüdrət İsmayıl oğlu.

Azərbaycan Respublikası, Gəncə şəhəri,
M.Bürcəliyev küçəsi, ev 74.