01 avqust 2012, 15:00

Mətanət Vahid qızından, Gəncə, Azərbaycan

Hörmətli və əziz Prezident!

Sizin məqsədyönlü siyasətiniz nəticəsində respublikamızın bütün bölgələrində abadlıq və yenidənqurma işləri çox uğurla həyata keçirilir. Bu da ümumilikdə əhalinin razılığı ilə qarşılanır. Şərqin ən qədim şəhərlərindən olan Gəncə özünün fərəhli, sevincli günlərini yaşayır.

Bu gün Gəncəmizin küçələri genişləndirilir, səkilər bərpa edilir. Yaşayış binalarının fasadları, dam örtükləri müasir tələblərə uyğun olaraq yenilənir. Köhnə binalar müasir memarlığın tələblərinə uyğun olaraq bərpa edilir.

Biz sakinlərin qürur ünvanı olan Cavad xan küçəsi, “Cümə məscidi”, Cavad xan türbəsi, “Çökək hamam” kimi tarixi əhəmiyyətli abidələrdə də təmir–bərpa işləri aparılır.

Bu gün Gəncənin üzü gülür. Haraya qədəm basırsan, haraya baxırsan ürəyin açılır. Parklar, meydançalar, istirahət guşələri sanki gül-çiçək yağışına qərq olub.

Mən də bir Azərbaycan vətəndaşı, qızı kimi Gəncənin bu gününü, cəlalını gördükcə sevincdən ürəyim köksümə sığmır.

Hörmətli Prezident!

Bu sevinc hisslərinə Sizin sayənizdə nail olduq. Mən Mətanət Vahid qızı, bütün gəncəlilər adından Sizə uzun ömür, cansağlığı diləyir və deyirəm: “Nə yaxşı ki, Siz varsınız, əziz Prezidentimiz!”.

Dərin hörmətlə,

Mətanət Vahid qızı
Azərbaycan Respublikası, Gəncə şəhəri.