Möhtərəm cənab Prezident!

Bu gün bir daha sübut etdiniz ki, hər bir azərbaycanlının Prezidentisiniz. Ramil Səfərovun Vətənə ekstradisiyasını və Sizin Sərəncamınızla azadlığa buraxılmasını eşidəndə ulu Tanrıya şükür etdim ki, nə yaxşı bu xalq müqəddəratını Sizə etibar edib.
Qoy ümummilli liderimiz Heydər Əliyevin ruhu bugünkü xəbəri eşidib bir daha şad olsun! Qoy bu xalq Sizin belə uğurlarınızı tez-tez eşidib sevinsin. Qoy düşmənlərimiz bu xəbəri eşidib sarsılsın, məhv olsun, bilsin ki, Azərbaycan xalqının İlham Əliyev kimi müdrik, qorxmaz, dəyanətli, qayğıkeş Prezidenti vardır.

Cənab Prezident, biz əminik ki, Siz doğma Qarabağımızı da yağı düşmənin tapdağından azad edəcəksiniz. Necə ki, bu gün Ramil Səfərovun azad edilməsi ilə bütün dünyanı mat qoydunuz. Sizin şəninizə bu məktuba nə qədər gözəl sözlər yazsam belə azdır. Ulu Tanrı Sizə hər işinizdə kömək olsun. Sizi bu uğurumuz münasibətilə bir daha təbrik edir, Sizə möhkəm cansağlığı, uzun ömür arzulayıram.

Dərin hörmət və ehtiramla,
Əliyev Sabir Zeynal oğlu.

Azərbaycan Respublikası, Ağcabədi rayonu,
Kəhrizli kəndi.