Aybəniz Həsənovadan, Bakı, Azərbaycan

Möhtərəm Prezident!

2013-cü il 4 mart tarixli Sərəncamınızla mənə verdiyiniz Azərbaycan Respublikasının “Əməkdar memarı” fəxri adına görə Sizə dərin təşəkkürümü bildirirəm.

Çox sevindirici haldır ki, ümummilli lider Heydər Əliyevin əsasını qoyduğu və Sizin böyük uğurla davam etdirdiyiniz siyasi kurs nəticəsində bu gün ölkəmizin imkanları müxtəlif sahələrdə xeyli artmış, Azərbaycan istənilən memarlıq nümunəsini yaratmağa qadir dövlətə çevrilmişdir. Azərbaycanda memarlıq abidələrinin qorunması və ölkəmizin tarixi simasını saxlamaqla müasirləşməsinə verdiyiniz böyük önəm bizi çox sevindirir. Bu gün ölkəmizdə bərpa edilmiş onlarla tarixi abidə, həyata keçirilmiş yeni memarlıq layihələri və imzaladığınız Sərəncam məhz bu diqqət və qayğını təcəssüm etdirir.

Zati-aliləri, memarlara göstərdiyiniz hədsiz diqqət və qayğı biz memarları ölkəmizin daha da gözəlləşdirilməsi naminə fəaliyyətə ruhlandırır. Göstərdiyiniz diqqət və qayğıya görə Sizə bir daha dərin təşəkkürümü bildirir, Sizə və ailənizə möhkəm cansağlığı, məsul fəaliyyətinizdə müvəffəqiyyətlər arzu edirəm.

Dərin ehtiram və ən səmimi arzularla,

Həsənova Aybəniz.

Azərbaycan Respublikası, Bakı şəhəri.