Möhtərəm Prezident!

Azərbaycan Respublikasında muzey işçilərinə fəxri adların verilməsi haqqında Sərəncamınız mədəniyyət sahəsində çalışan yaradıcı insan kimi məni də qürurlandırdı. Məni “Əməkdar Mədəniyyət işçisi” fəxri adına layiq gördüyünüzə görə, Sizə dərin minnətdarlığımı bildirirəm.

Sizin Azərbaycan xalqının ədəbi-mədəni, milli-mənəvi irsinin təbliği işinə göstərdiyiniz dəstək və qayğı danılmazdır. Ulu öndər Heydər Əliyev ənənələrinin layiqli davamçısı kimi Siz xalqımızın tarixi keçmişinə, mənəvi dəyərlərinə həssaslıqla yanaşır, elm və mədəniyyət xadimlərinə, ziyalılara hər zaman dəstək olursunuz. Abdulla Şaiq Talıbzadə ailəsi də bu dəstək və qayğını həmişə hiss etmişdir. Ümummilli lider Heydər Əliyev Abdulla Şaiq irsinin qorunması və təbliği ilə bağlı bir neçə tarixi Fərman imzalamışdır. Fərmanların icrası ilə bağlı keçirilən tədbirlərdən ən mühümü ədibin 100 (1981) və 120 (2001-ci il) illik yubileylərinin qeyd edilməsi olmuşdur. Həmçinin 1998-ci ildə Heydər Əliyev cənablarının müvafiq Sərəncamına əsasən Abdulla Şaiqin oğlu akademik Kamal Talıbzadə “Şöhrət” ordeni ilə təltif edilmişdir. 2005-ci ildə K.Talıbzadə Abdulla Şaiqin mənzil-muzeyinin artıq köhnəlmiş binasının təmir etdirilməsi ilə əlaqədar Heydər Əliyev Fonduna müraciət etmişdir. Minnətdarlıq hissi ilə qeyd etmək istərdim ki, Fondun prezidenti Mehriban xanım Əliyeva atamın xahişinə biganə qalmamış, muzeyi əsaslı təmir etdirmişdir.

Möhtərəm Prezident, Talıbzadələr ailəsinə göstərdiyiniz xüsusi diqqət və qayğıya görə Sizə bir daha dərin minnətdarlığımı bildirir və Sizi əmin edirəm ki, mənə göstərilən etimadı doğruldacağam.

Hörmətlə,

Talıbzadə Ülkər,
Abdulla Şaiqin mənzil-muzeyinin direktoru.

Azərbaycan Respublikası, Bakı şəhəri,
Ü.Hacıbəyov küçəsi, ev 45, mənzil 94.