Hörmətli cənab Prezident!

Ulu öndər Heydər Əliyevin qurub-yaratdığı müasir müstəqil Azərbaycan dövlətinin çiçəklənməsində, ölkənin bütün regionlarının abadlaşdırılmasında, yeni yolların salınmasında, məcburi köçkünlərin həyat şəraitinin yaxşılaşdırılmasında Sizin misilsiz əməyiniz vardır. Göstərdiyiniz diqqət və qayğı sayəsində Pirallahı qəsəbəsində də böyük quruculuq işləri həyata keçirilir. Pirallahı rayonu yaradıldıqdan sonra bu işlər daha geniş vüsət almışdır. Səkilər, idman meydançaları, uşaqların istirahət yerləri səliqəsiz satış köşklərindən, lazımsız tikililərdən təmizlənmiş, qəsəbə başdan-başa abadlaşdırılmışdır. 

Hörmətli cənab Prezident! Rayonumuza göstərdiyiniz diqqət və qayğıya görə Sizə dərin minnətdarlığımızı bildirir, fəaliyyətinizdə uğurlar arzulayırıq. Biz Sizin daxili və xarici siyasətinizi bəyənirik və növbəti prezident seçkilərində Sizin namizədliyinizi dəstəkləyəcəyik.

Çox hörmətlə,

Allahverdiyev Əbülfət Bəylər oğlu

Qarabağ müharibəsi veteranı, təqaüddə olan polkovnik-leytenant

Azərbaycan Respublikası, Bakı şəhəri, Pirallahı rayonu.