Möhtərəm Prezident!

Mənim 80 yaşım var. Bütün uşaqları öz övladım və nəvəm sayıram. İki yaşlı İmranın başına gələn hadisəni eşidəndə bu körpəyə kömək etmək üçün Allaha dua etməkdən başqa əlimdən heç nə gəlmədi. Sizin İmrana yardım göstərəcəyinizi eşidəndə Allaha şükür etdim ki, mənim dualarım yerinə yetdi.

Hörmətli cənab Prezident, Sizin bu əməliniz bizə Ulu öndər Heydər Əliyevin xeyirxahlığını və qayğıkeşliyini xatırladır. Siz onun yolunu layiqincə davam etdirərək, xalqın qayğısına qalırsınız. Ölkəmizin Sizin kimi rəhbəri olduğuna görə bizdən sonrakı nəsillərdən heç bir nigarançılığım yoxdur. Allahdan Sizə uzun ömür, möhkəm cansağlığı, bundan sonra hələ uzun illər bu ölkəyə rəhbərlik etməyinizi arzulayıram.

İsmayılova Əminəxatun.

Azərbaycan Respublikası, Qəbələ rayonu, Mıxlıqovaq kəndi.