Hörmətli cənab Prezident! 

Sizin sərhədçilərlə keçirdiyiniz müşavirə zamanı baş verən zəlzələ anında göstərdiyiniz sərkərdəyə layiq soyuqqanlılığınız məni valeh etdi və qərara aldım ki, bu məktubumla Sizə minnətdarlığımı bildirim. Əsası ümummilli lider Heydər Əliyev tərəfindən qoyulan müstəqil Azərbaycanın inkişafı Sizin səyləriniz və bacarığınız nəticəsində ən yüksək həddə çatmışdır.

Ona görə də biz Azərbaycan gəncləri bu əmin-amanlığın, sabitliyin qarantı olan, Azərbaycan naminə öz sıralarında sıravi kəndlidən tutmuş alimə qədər Azərbaycan vətəndaşlarını birləşdirməyi bacaran Yeni Azərbaycan Partiyasının və müasir Azərbaycanın qurucusu ümummilli lider Heydər Əliyevi hörmətlə anırıq. Sizin xeyir-duanızla inşa edilən Şirvan Müalicə-Diaqnostika Mərkəzində mühəndis vəzifəsində çalışıram. Çalışdığım müəssisədə gənclər təşkilatının sədr müaviniyəm. 260 nəfərdən ibarət olan kollektivimiz daim Sizin Azərbaycanımıza, o cümlədən Şirvanlılara olan qayğınızdan fəxrlə danışır.

Ölkəmizdə aparılan quruculuq-abadlıq işləri bizə əsas verir ki, bizə və xalqa layiq olanı seçək. Bizim seçimimiz bəllidir. Üzvü olduğumuz partiyanın yaradıcısının layiqli davamçısına. Qarşıdan gələn prezident seçkilərində biz şirvanlılar və çalışdığımız müəssisənin kollektivi yekdilliklə Sizi dəstəkləyəcəyik. Buna əmin ola bilərsiniz. Sizə və ailə üzvlərinizə möhkəm cansağlığı, ailə səadəti, bu çətin və məsuliyyətli işinizdə müvəffəqiyyətlər arzu edirəm.
Qoy qədim Azərbaycanımız Sizin sayənizdə daim çiçəklənsin!

Hörmətlə,

Mirzəyev Zaur Davud oğlu.

Azərbaycan Respublikası, Şirvan şəhəri, Bayramlı qəsəbəsi.