Elçin Fərmanovdan, Bakı, Azərbaycan

Əziz və hörmətli Prezident!

Ölkəmizin son illər bu qədər gözəlləşməsi, respublikamızda sabitliyin təmin olunması və əmin-amanlığın yaradılması bir Azərbaycan vətəndaşı kimi məni heyrətə gətirmişdir. Bu təşəkkür məktubunu Sizə yazmağı özümə borc bildim. Mənim üçün ən sevindirici fakt isə bizim uşaqlarımızın təhsil aldığı Xətai rayonu 249 saylı orta məktəbin əsaslı təmiridir. Azərbaycan xalqı üçün gördüyünüz işlər sadalamaqla bitməz. Ən əsası isə Siz bizim Ulu öndərimizin yadigarısınız. Ulu öndərimizin ürəyi həmişə Azərbaycan xalqı ilə birgə döyünmüşdür və son nəfəsinə qədər Azərbaycan xalqına rəhbərlik etmişdir. İndi bu yolun davamçısı Sizsiniz.

Möhtərəm Prezident, Sizə uzun ömür, cansağlığı, ailə səadəti, işlərinizdə müvəffəqiyyətlər arzulayıram. Ən böyük arzum, diləyim isə Sizi həmişə Azərbaycan xalqı ilə - bizimlə bir yerdə görməkdir. Mən bir Azərbaycan vətəndaşı kimi Sizinlə fəxr edirəm və Sizin bizim ömürlük Prezidentimiz olmağınızı Ulu Tanrıdan diləyirəm.

Hörmətlə,

Fərmanov Elçin Ramiz oğlu.
Azərbaycan Respublikası, Bakı şəhəri.