Möhtərəm cənab Prezident, 

Sizin rəhbərliyinizlə Azərbaycan gündən-günə abadlaşır, yeni istehsal və emal müəssisələri yaradılır, sosial problemlər aradan qaldırılır, insanların maddi rifahı yaxşılaşır.

Cənab Prezident, 2008-ci ilin yanvarında Ağcabədiyə səfəriniz zamanı 14 min nəfərdən artıq əhalisi olan Qaradolaq, Aran, Mehrablı və Kəbirli kəndlərinin 10 illərlə davam edən içməli su problemi Sizin qayğınız və təşəbbüsünüzlə həll edildi. Ümumiyyətlə, Sizin diqqət və qayğınız sayəsində rayonumuz hərtərəfli inkişaf edir. Rayonumuza qaz çəkilişi sürətlənmiş, 2 süd emalı zavodu, müasir tipli xəstəxana və sair obyektlər tikilmişdir. 

Bu günlərdə bizi bir daha sevindirdiniz. 2010-cu il oktyabrın 21-də imzaladığınız Sərəncamla Azərbaycan Respublikası Prezidentinin Ehtiyat Fondundan Ağcabədi-Qaradolaq-Kəbirli avtomobil yolunun yenidən qurulması məqsədilə 1,5 milyon manat vəsait ayırdınız. Beş məntəqəni birləşdirən bu yolun yenidən qurulması elə bu kəndlərin də yenidən qurulması və əhalinin ən vacib problemlərinin həll edilməsi deməkdir. 

Möhtərəm Prezident, bizə göstərdiyiniz bu qayğı və diqqətə görə bütün kənd sakinləri, ağsaqqal və ağbirçəklərimiz, gənclərimiz və bütün Ağcabədi əhalisi adından Sizə dərin təşəkkürümüzü bildirir, möhkəm cansağlığı, respublikamız üçün gördüyünüz bütün işlərinizdə uğurlar arzulayırıq. 

Əmin ola bilərsiniz ki, biz Sizin daxili və xarici siyasətinizi həmişə olduğu kimi bundan sonra da dəstəkləyəcək və hər zaman Sizinlə birlikdə olacağıq. 

Ulu Tanrı Sizə yar olsun!

Ağcabədi rayonunun Aran, Kəbirli, Qaradolaq,
Yeni Qaradolaq, Mehrablı kəndlərinin sakinləri,
icra nümayəndələri, bələdiyyə üzvləri, ziyalıları,
ağsaqqalları və gəncləri (cəmi – 654 imza)