29 oktyabr 2010, 14:20

Saatlı rayonunun sakinlərindən, Saatlı, Azərbaycan

Əziz və hörmətli Prezidentimiz İlham Əliyev,

2010-cu il oktyabrın 21-də imzaladığınız Sərəncamla bütün Saatlı rayonunun əhalisini, xüsusilə də Saatlı-Musalı-Məzrəli avtomobil yolunun birləşdirdiyi 8 yaşayış məntəqəsinin sakinlərini hədsiz dərəcədə sevindirdiniz. 20 min nəfər əhalinin yaşadığı bu kəndlərin ən böyük problemini həll etdiyinizə görə hamımız Sizə ürəkdən təşəkkür edir və dərin minnətdarlığımızı bildiririk. 

Möhtərəm Prezident, bu, Sizin Saatlı rayonuna göstərdiyiniz daimi qayğı və diqqətin yeni təzahürüdür. Siz bundan əvvəl də dəfələrlə Saatlı rayonunda olmuş, rayonun bir çox problemlərinin həllinə yaxından kömək göstərmisiniz. Bunun sayəsində bu gün Saatlı rayonunda böyük abadlıq və quruculuq işləri gedir. Rayon mərkəzi, kənd və qəsəbələrimiz sürətlə abadlaşır. Rayonumuzun sakinləri bu il sel daşqınları zamanı Sizin qayğınızı xüsusilə yaxından hiss etdilər. Siz bir daha hər bir azərbaycanlının Prezidenti olduğunuzu əyani surətdə təsdiq etdiniz. 

Biz inanırıq ki, Sizin ayırdığınız vəsaitlə kəndlərimizin yolları qısa müddətdə müasir tələblər səviyyəsində bərpa ediləcək, bunun sayəsində həmin kəndlər daha sürətlə inkişaf edəcək, Azərbaycanın ən gözəl yerlərindən birinə çevriləcəkdir.
Bizə göstərdiyiniz qayğıya görə bir daha Sizə ürəkdən minnətdarlığımızı bildirir, Azərbaycanın bu günü və gələcəyi üçün gördüyünüz böyük işlərinizdə müvəffəqiyyətlər arzulayırıq. 

Allah köməyiniz olsun!

Dərin hörmətlə,

Saatlı rayonunun Bəylər, Əlisoltanlı, Hacıqasımlı,
Kamallı, Qara Nuru, Məmmədabad, Məzrəli Mircəlal,
Musalı, Naharlı və Nərimankənd, Varxankənd kəndlərinin
sakinləri, bələdiyyə üzvləri, məktəb direktorları, müəllimləri,
ağsaqqalları, gəncləri, habelə rayonda yaşayan
Axısxa türkləri adından (cəmi – 151 imza).